துதி

அங்காள பரமேஸ்வரி துதி

ஓர்முகம் முக்கண் சதுர்புஜம்

     ஓங்குச டையக்னி செம்பவள ரூபிணி

சீர்வெண் பொற்றுகில் பூரணி

     சர்வா லங்கார கார்முகில் காருணி

கூர்மிகும் வாள்சூல பாசவுடுக்

     கைகாபா லதாரி ணியரிமா வாகினி

பார்புகழ் கைலாயன் பாகினி

      பார்வதி அங்காளி பதம்பணிந் தேனே

ஒரு முகமும், மூன்று கண்களும் நான்கு கைகளும் உடையவள்; அக்கினித் தணல் போன்று உயர்ந்த சிவந்த கூந்தலைக் கொண்டவள்; செம்பவளம் போன்ற சிவந்த நிறம் கொண்டவள்;

பொன் வேலைப்பாடுகள் கூடிய வெண்பட்டாடை அணிந்தவள்; அனைத்திலும் பூரணத்துவம் தருபவள்; சகல அலங்காரங்களும் அணிகலன்களும் பூண்டவள்; கருத்த மழைமேகம் போன்ற கருணையைக் கொண்டவள்;

கூர்மையான வாள், திரிசூலம், கபாலம், பாசக் கயிறு, உடுக்கை ஆகியவற்றைத் தன் கைகளில் தரித்தவள்; சிம்மத்தை தன் வாகனமாகக் கொண்டவள்;

உலகத்தோர் எல்லாம் போற்றும் கைலாயநாதனாகிய சிவனின் ஒரு பாகமாக இருப்பவளாகிய பார்வதியின் வடிவமான அங்காள பரமேஸ்வரி அன்னையின் பாதங்களை வணங்குகின்றேன்.